A Praza do 10 de Marzo, no barrio fenés de San Valentín, acollerá ás 20:30 horas deste mércores 17 de agosto a inauguración oficial da exposición "Rostos da Memoria. Ferrol 1972", un proxecto fotográfico e artístico de Xurxo Lobato en homenaxe ás persoas que sufriron a represión do franquismo polas loitas obreiras na cidade de Ferrol en 1972, “que seguen vivas e merecen un recoñecemento público no ano do 50 aniversario dos asasinatos de Amador e Daniel, "segundo o fotógrafo.
A mostra -que permanecerá na praza ata o 31 de agosto- está promovida pola Mancomunidade de Municipios da Comarca de Ferrol co apoio das asociacións Fuco Buxán e Memoria Histórica Democrática. Tras a súa estrea en Fene, a mostra percorrerá o resto de concellos integrados no ente supramunicipal, como Ares, Cabanas, Ferrol, Mugardos, Narón, Neda e Valdoviño.